Landsstýrismaðurin hittir norðurlendsku starvsbrøður at umrøða ungdómsarbeiðsloysið

11. november á árliga fundinum í Norðurlendska Ráðaharraráðnum.

 

Spurningurin er, hvussu vit leggja tiltøkini til rættis at minka um vaksandi ungdómsarbeiðsloysið her og nú, og samstundis fyrireika okkum upp á at seta tiltøk í verk fyri at minka um trupulleikan av manglandi arbeiðsmegi, sum kann fara at verða í framtíðini, orsakað av, at ein alsamt størri partur av fólkinum verður eldri.

 

Umrøðan av hesum spurningunum tók støðið í fundinum, sum norðurlendsku arbeiðsmarknaðarráðharrarnir høvdu við ES-kommisserin í arbeiðsmarknaðarmálum, Vladimir Spidla, og umboð fyri norðurlendsku arbeiðsgevararnar og arbeiðstakararnar dagin fyri, tann 10. november.

 

Her varð m.a. umrøtt, hvussu arbeiðsmarknaðarpolitikkurin í norðurlondum kann vera við til at førleikamenna arbeiðsmegina, soleiðis at førleikin svarar til tað, sum arbeiðsmarknaðurin hevur tørv á. Í hesum sambandi varð serliga víst á týdningin av, at arbeiðsmarknaðarpolitikkurin og útbúgvingarpolitikkurin verður samskipaður.

 

Ráðharrarnir vórðu á fundinum í Íslandi tann 11. november samdir um at bjóða viðkomandi sektorum til eitt samstarv um at kortleggja, hvørji tiltøk londini hava sett í verk til tess at minka um vaksandi undómsarbeiðsloysið her og nú og at byrgja upp fyri manglandi arbeiðsmegi í longdini.