Landsstýrismaður vil ganga á odda við el-bilum

Landsstýrismaðurin í vinnumálum, Johan Dahl, hevur við embætisfólki luttikið á árligu ráðstevnuni “Driving Sustainability”, sum var hildin í Reykjavík 14.-15. september. Endamálið við ráðstevnuni er at seta fokus á møguleikarnar fyri umhvørvisvinaligan flutning.

Á ráðstevnuni legði Mitsubishi fram sínar ætlanir í s.v. verkætlanina fyri umhvørvisvinaligum flutningi í Íslandi, sum í høvuðsheitum er grundað á elbilar til persónsflutning og biogass til tungan flutning og skip. Eisini aðrar fyritøkur løgdu fram sínar ætlanir viðv. el-bilum og sonevndum hybridbilum fyri tey komandi árini.

Johan Dahl sigur í hesum sambandi: “Eg eri sannførdur um, at flutningur við el-bilum er framtíðin, og henda ráðstevna hevur styrkt meg í trúnni. Tess fyrr vit í Føroyum síggja teir stóru møguleikarnar sum liggja í elektrifisering av flutningi, tess betri. Føroyar eru eitt lítið land við lutfalsliga stuttum koyristrekkjum og støðugum veðurlagi, og er sostatt skræddaraseymað til hetta slagi av flutningi.”

Á ráðstevnuni løgdu norsk umboð eisini fram um teir karmarnar, sum Noreg hevur skapt fyri el-bilum, m.a. við avgjaldsfrítøku fyri skrásetingargjaldi, MVG og vegskatti, og sersømdir í s.v. parkering. Harumframt gjalda el-bilar í Noregi hvørki nýtslugjald fyri gjaldsvegir ella ferðaseðlagjald fyri fergur.

Vinnumálaráðið fer nú at gera eina ætlan fyri, hvussu karmarnir í Føroyum kunnu skipast, so teir eggja fólki til at fáa sær elbilar.

Johan Dahl: “Um tað almenna skapar røttu karmarnar og gongur á odda, tá stovnar og fyritøkur hjá tí almenna hava tørv á nýggjum akførum, kunnu Føroyar innanfyri lutfalsliga fá ár gerast millum fremstu lond, tá tað snýr seg um umhvørvisvinaligan flutning. Hetta er bæði ein búskaparligur fyrimunur og ein fyrimunur í s.v. við veðurlagsbroytingar.”

Meira fæst at vita um ráðstevnuna við at fara inn á www.drivingsustainability.org.

Í løtuni er støðan tann, at eftirspurningurin eftir el-bilum er nógv størri enn útboðið, og tí er í løtuni neyðugt at bíleggja bilarnar frammanundan. Landsstýrismaðurin í Vinnumálum nýtti høvið at bíleggja sær ein el-bil á ráðstevnuni.