Landsstýrismaður mælir til § 19-kanning av Eik-grunni og grunnaeftirliti

Fyrning, rættartrygd, rættarmálsføri og aðrar løgfrøðiligar umstøður í málinum um Eik- grunnin og grunnaeftirlitið hjá Skráseting Føroya bera í sær, at landsstýrismaðurin í vinnumálum, Johan Dahl, mælir til, at Løgtingið letur eina § 19-nevnd við trimum tinglimum standa fyri at kanna alment umvarðandi viðurskifti í sambandi við virksemið hjá Eik-grunninum, og eftirlitinum við grunninum, í tíðarskeiðinum 2002-2010. Uttanfyri arbeiðssetningin er at kanna agamáls- ella revsirættarviðurskifti hjá einstaklingum.

Løgfrøðiliga ráðgevingin í landsstýrinum hevur gjørt meting av, um og hvussu málið um Eik-grunnin og málið um eftirlitið við hesum grunni kunnu kannast.

Í stuttum er meting teirra m.a., at tað er ikki møguligt at halda fram við at kanna Eik-grunnin eftir verandi leisti, tvs. eftir § 59 í lógini um vinnurekandi grunnar.

Høvuðsorsøkirnar fyri hesum eru:

• Málið um Eik-grunnin er fyrnað
• Rættartrygdin hjá skuldsettum kemur í vanda
• Landið hevur ikki longur rættarmálsføri í málinum um Eik-grunnin

Tá ið tað snýr seg um at kanna grunnaeftirlitið, sum liggur hjá Skráseting Føroya, er løgfrøðiliga metingin, at heldur ikki í tí førinum ber til at kanna eftir § 59 í grunnalógini, tí hon heimilar einans kanningum av vinnurekandi grunnum, umsitingum teirra og kanning av roknskapum.

Niðurstøðan hjá løgfrøðiligu ráðgevunum er, at ein kanning sambært § 19 í stýrisskipanarlógini kann vera rætta amboðið at kanna bæði Eik-grunnin og grunnaeftirlitið við.

Verður hesin møguleiki brúktur, er tað ein nevnd við tinglimum, evt. við umboðum úr øllum flokkum á Tingi, ið stendur fyri fyri at kanna málini. Nevndin setur sjálv fólk at vera sær til hjálpar í kanningararbeiðinum og skrivar síðani eina frágreiðing um málið.

Landsstýrismaðurin í vinnumálum, Johan Dahl, fylgir løgfrøðiligu ráðgevingini  og mælir til, at Løgtingið setur eina § 19-nevnd at kanna málið um Eik-grunnin og/ella málið um eftirlitið hjá Skráseting Føroya við sama grunni. Uttanfyri arbeiðssetningin er at kanna agamáls- ella revsirættarviðurskifti hjá einstaklingum.

Høvuðsmálið við nevndararbeiðinum er at fáa tilvega neyðugar upplýsingar soleiðis at stig kunnu verða tikin til, at vit ikki endurtaka óhepnar mannagongdir og avleiðingar, sum hava verið av Eik-grunsmálinum.